1Cor 14 | BOJ | STEP | Deqa was qu, niŋgi gaigai qalaqalaiyo kumbra dauryosib soqniye. Sosib wau kalil Qotei aqa Mondor na niŋgi eŋgeqnu qaji di dego yqajqa tulaŋ siŋgilaoqniye. Wau boledamu bei agiende. Qotei aqa Mondor na niŋgi siŋgila eŋgimqa niŋgi Qotei aqa medabu oqnsib anjam palontoqniye. Osib wau di yqajqa tulaŋ siŋgilaoqniye.

1 Corinthians 14

Iga Qotei aqa medabu oqnsim anjam palontoqnqom di wau bolequja

1 Deqa was qu, niŋgi gaigai qalaqalaiyo kumbra dauryosib soqniye. Sosib wau kalil Qotei aqa Mondor na niŋgi eŋgeqnu qaji di dego yqajqa tulaŋ siŋgilaoqniye. Wau boledamu bei agiende. Qotei aqa Mondor na niŋgi siŋgila eŋgimqa niŋgi Qotei aqa medabu oqnsib anjam palontoqniye. Osib wau di yqajqa tulaŋ siŋgilaoqniye. 2 Niŋgi qalie, tamo naŋgi meŋ bulyoqnsib qure utru segi segi naŋgo anjam mareqnub di naŋgi tamo naŋgi minjrosaieqnub. Naŋgi Qotei segi minjeqnub. Di kiyaqa? Anjam di uli anjam deqa tamo qudei naŋgi qusib poinjrqa keresai. Qotei aqa Mondor na naŋgi siŋgila enjreqnu deqa naŋgi meŋ bulyoqnsib anjam di mareqnub. 3 Ariya tamo naŋgi Qotei aqa medabu oqnsib anjam palonteqnub qaji naŋgi anjam aqa damu geregere babteqnab tamo naŋgi quoqnsib poinjreqnu. Deqa anjam dena naŋgo areqalo siŋgilatetnjroqnsiq naŋgi kumbra bole yqajqa are tigeltetnjroqnsiq naŋgo are miligi boletetnjreqnu. 4 Tamo naŋgi meŋ bulyoqnsib qure utru segi segi naŋgo anjam mareleŋeqnub qaji naŋgi naŋgo segi areqalo siŋgilateqnub. Ariya tamo naŋgi Qotei aqa medabu oqnsib anjam palonteqnub qaji naŋgi na Kristen tamo uŋgasari kalil naŋgi dego areqalo siŋgilatetnjreqnub. 5 Ijo areqalo agiende. Niŋgi kalil meŋ bulyoqnsib qure utru segi segi naŋgo anjam maroqnqab di bolequja. Ariya niŋgi Qotei aqa medabu oqnsib anjam palontoqnqab di tulaŋ boledamu. Niŋgi quiye. Tamo bei a meŋ bulyosim qure utru bei naŋgo anjam maroqnim tamo bei a kamba anjam di aqa damu poiyim bulyosim palontqas di kere. Anjam dena Kristen tamo uŋgasari kalil naŋgo areqalo siŋgilatetnjrqas. Ariya anjam bulyo tamo bei sqasai di meŋ bulyo tamo aqa anjam na Kristen tamo uŋgasari naŋgo areqalo siŋgilatetnjrqasai. Deqa tamo naŋgi Qotei aqa medabu oqnsib anjam palonteqnub qaji naŋgi na meŋ bulyo tamo naŋgi tulaŋ buŋnjresqab. 6 O was qu, niŋgi ijo anjam endeqa geregere are qaliye. E niŋgi qa bosiy meŋ bulyosiy qure utru segi segi naŋgo anjam merŋgit niŋgi qusib poiŋgwasai di anjam dena niŋgi kiersim aqaryaiŋgwas? Keresai. Ariya e Qotei aqa uli anjam bei ubtsiy merŋgitqa kio aqa qalie bole bei babtitqa kio aqa medabu osiy anjam palontitqa kio anjam bei plaltitqa kio niŋgi qusib geregere poiŋgwas di kere. Anjam dena niŋgi aqaryaiŋgwas.

7 Iŋgi qudei ŋambile sosai qaji e deqa niŋgi merŋgit quiye. Tamo bei na yumba qamimqa kio gombiŋ anjamimqa kio ariya aqa anjam di jagwa na osi taqal waiyqas di iga kiersim aqa lou poigwas? Di keresai. 8 Tamo naŋgi qoto qa gilqa marsib gul anjamibqa ariya gul aqa anjam di jagwa na osi taqal waiyqas di tamo yai naŋgi qoto qa gilqab? Tamo dego bei sosai. 9 Dego kere niŋgi meŋ bulyosib qure bei naŋgo anjam marqab di tamo naŋgi kiersib qusib poinjrqas? Keresai. Nuŋgo anjam di dego jagwa na osi taqal waiyqas. 10 Bole, mandamq endia qure utru segi segi naŋgo anjam gargekoba unub. Naŋgo anjam kalil di damu ti. 11 Ariya tamo bei na e anjam bei merbim qusiy aqa damu poibqasai di a e qa marqas, “A yauŋ tamo.” Yim deqa e kamba a qa marqai, “A dego yauŋ tamo.” 12 O was qu, niŋgi qure utru segi segi naŋgo anjam maroqnqab di niŋgi kumbra di itqab. E qalieonum, niŋgi Qotei aqa Mondor aqa kumbra oqajqa tulaŋ siŋgilaeqnub. Ariya niŋgi na Kristen tamo uŋgasari naŋgo areqalo siŋgilatetnjrqa maroqnsib deqa Qotei aqa Mondor aqa kumbra oqajqa olo tulaŋ siŋgila na wauoqniye.

Pol a meŋ bulyo kumbra qa anjam marej

13 Ariya nuŋgo ambleq di tamo bei a meŋ bulyosim qure utru bei naŋgo anjam marqa osimqa a mati endegsi Qotei pailyem, “O Abu, ni na siŋgila ebimqa e anjam aqa damu geregere poibim bulyosiy palontqai. Yim tamo uŋgasari naŋgi qusib geregere poinjrqas.” 14 Niŋgi are qaliye. E meŋ bulyosiy qure utru bei naŋgo anjam na Qotei pailyqai di anjam aqa damu e poibqasai. Ijo segi mondor ijo are miligiq di unu qaji a segi pailyqas. Ijo areqalo laŋa qusim damu poiyqasai. 15 Deqa e endegyqai. E ijo mondor ti ijo areqalo ti turtsiy pailyoqnqai. E ijo mondor ti ijo areqalo ti turtsiy louoqnqai dego. 16 Ni ino mondor na segi Qotei pailyqam di tamo laŋaj bei a sosim ino pail di qusim poiyqasai di a endegsi marqa keresai, “Ni bole maronum.” A degsi marqa keresai. Di kiyaqa? A ino pail poiyosai deqa. 17 Bole, ni Qotei pailyosim biŋiyonum di bolequja. Ariya tamo di a ino pail qusiq poiyosai deqa ino pail dena aqa areqalo siŋgilatetosai. 18 E Qotei biŋiyeqnum. Di kiyaqa? E bati gargekoba meŋ bulyoqnsim qure utru bei bei naŋgo anjam mareleŋeqnum. Ijo kumbra dena e na niŋgi tulaŋ buŋgejunum. 19 Ariya Kristen tamo uŋgasari naŋgi Qotei louqa koroesoqnibqa e naŋgo koroq dia anjam tulaŋ truquyala segi minjroqnit naŋgi qusib poinjrqas di bolequja. Ariya e meŋ bulyosiy qure utru segi segi naŋgo anjam tulaŋ olekoba totoryosiy naŋgi minjroqnit naŋgi poinjrqasai di keresai.

20 O was qu, niŋgi aŋgro kiñilala naŋgi bulosib nanariosib walwelaib. Niŋgi tamo bole bole naŋgi bulosib areqalo bole na walweloqniye. Niŋgi qalie, aŋgro mom naŋgi kumbra uge qa poinjrosaieqnu. Deqa niŋgi kumbra uge kalil qa aŋgro mom naŋgi bulosib nanariosib soqniye. 21 Agi Qotei aqa dal anjam bei nami endegsib neŋgreŋyeb unu, “Tamo Koba Qotei a marqo, ‘E na qure utru bei bei qaji tamo naŋgo anjam na ijo segi tamo uŋgasari naŋgi anjam minjroqnqai. Ariya naŋgi ijo anjam quetbqasai.’” 22 Deqa was qu, Qotei a na tamo naŋgo meŋ bulyetnjreqnu di aqa utru agiende. Kumbra dena a na tamo uŋgasari a qa naŋgo areqalo siŋgilatosaieqnub qaji naŋgi aqa siŋgila osornjreqnu. Tamo uŋgasari a qa naŋgo areqalo siŋgilateqnub qaji naŋgi qa sai. Ariya tamo naŋgi Qotei aqa medabu oqnsib anjam palonteqnub di aqa utru agiende. Kumbra dena a na tamo uŋgasari a qa naŋgo areqalo siŋgilateqnub qaji naŋgi aqaryainjreqnu. Tamo uŋgasari a qa naŋgo areqalo siŋgilatosaieqnub qaji naŋgi qa sai.

23 Deqa niŋgi kalil Qotei tal miligiq di koroesosibqa niŋgi kalil meŋ bulyosib qure utru segi segi naŋgo anjam maroqnqab di bolesai. Niŋgi degyqab di tamo qudei Qotei qaliesai qaji naŋgi nuŋgo koro miligiq gilsib nuŋgo anjam di qusib niŋgi qa marqab, “Naŋgi nanarionub deqa anjam di mareqnub.” 24 Ariya niŋgi kalil Qotei aqa medabu osib anjam palontoqnib ariya tamo bei Qotei qaliesai qaji kio tamo laŋaj bei kio a nuŋgo koro miligiq gilsim nuŋgo anjam di qusim a poiyqas. Yim anjam dena aqa are qametim a aqa une qa geregere qalieqas. 25 Osim aqa areqalo uge kalil aqa are miligiq di uliejunu qaji di boleq atsim siŋga pulutosim Qotei aqa ñam soqtosim niŋgi merŋgwas, “Bole, Qotei a nuŋgo ambleq di unu.”

Niŋgi Qotei louqajqa kumbra kalil geregere dauryosib soqniye

26 Deqa was qu, niŋgi Qotei louqa korooqnsibqa niŋgi endegyoqniye. Niŋgi kalil segi segi wau ti deqa niŋgi qudei louoqniye. Niŋgi qudei Qotei aqa anjam plaltoqniye. Niŋgi qudei Qotei aqa uli anjam ubtoqniye. Niŋgi qudei meŋ bulyosib qure utru segi segi naŋgo anjam maroqniye. Niŋgi qudei qure utru segi segi naŋgo anjam aqa damu poiŋgim bulyosib palontoqniye. O was qu, nuŋgo wau segi segi dena niŋgi na Kristen tamo uŋgasari naŋgi siŋgilatnjroqniye. 27 Tamo qudei naŋgi meŋ bulyosib qure utru segi segi naŋgo anjam marqa laqnib niŋgi na minjrib tamo aiyel kio tamo qalub kio segi anjam marqab. Tamo gargekoba naŋgi meŋ bulyqab di bolesai. Ariya naŋgi koba na turtsib anjam maraib. Bei nami marim bei bunu marqas. Ariya naŋgi meŋ bulyosib anjam maroqnib niŋgi na anjam bulyo tamo bei minjib a naŋgo anjam di qusim poiyim a na anjam bulyosim plalteme. Yim tamo uŋgasari kalil naŋgi qusib poinjrqas. 28 Ariya nuŋgo koroq dia anjam bulyo tamo bei sosaiamqa meŋ bulyo tamo naŋgi anjam maraib. Naŋgi mequmosib naŋgo segi are miligiq di Qotei pailyebe. 29 Tamo aiyel kio tamo qalub kio naŋgi segi Qotei aqa medabu oqnsib anjam palontoqnebe. Tamo gargekoba naŋgi anjam palontoqnaib. Ariya naŋgi anjam palontosib merŋgoqnibqa naŋgo anjam bole kio sai kio deqa osib pegiyoqniye. 30 Tamo bei a tigelosim Qotei aqa anjam palontoqnim ariya Qotei na tamo bei awejunu qaji a anjam bei osoryim tamo nami anjam palonteqnu qaji a mati medabu getentosim olo awoamqa tamo di kamba tigelosim anjam palontqas. 31 Niŋgi segi segi kalil kumbra di dauryosib Qotei aqa medabu oqnsib anjam palontoqniye. Palontoqnib Kristen tamo uŋgasari kalil naŋgi qusib qalie osib anjam dena naŋgo are siŋgilatetnjroqnqas. 32 Niŋgi na Qotei aqa medabu o qaji tamo naŋgi minjribqa naŋgi na naŋgo segi medabu geregere taqatoqnsib anjam maroqnebe. Deqa naŋgi tigelqa batioqnim naŋgi tigelosib Qotei aqa anjam geregere palontoqnqab. 33 Qotei na aqa segi wau kalil geregere yoqnsiqa a na aqa wau bei niñaqyosaieqnu. Deqa iga kalil aqa kumbra di dauryosim areqalo qujaitosim koba na lawo sosim aqa wau geregere yoqnqom.

Ariya niŋgi Qotei louqa korooqnsibqa niŋgi na uŋgasari naŋgi minjribqa naŋgi mequmesoqneb. Naŋgi anjam maraib. Sawa sawa kalilq dia Qotei aqa segi tamo uŋgasari naŋgo koroq dia naŋgi kumbra degyeqnub. Deqa uŋgasari naŋgi naŋgo segi ñam aguq atoqnsib naŋgo tamo naŋgo sorgomq di geregere mequmosib soqnebe. Agi anjam di Moses aqa dal anjamq di unu. 35 Deqa koroq dia anjam palonto tamo naŋgi anjam palontoqnib uŋgasari naŋgi anjam aqa damu qalieqajqa maroqnib niŋgi na naŋgi saidnjrsib endegsib minjriye, “Yaintim nuŋgo segi talq dia niŋgi nuŋgo gumbuluŋ naŋgi nenemnjrib naŋgi na anjam aqa damu merŋgwab.” Niŋgi na naŋgi degsib minjriye. Di kiyaqa? Uŋgasari naŋgi koroq dia anjam marqab di kumbra bolesai. 36 O was qu, Qotei aqa anjam nuŋgoq dena brantej e? Niŋgi segi na Qotei aqa anjam eb e? Sai.

37 Nuŋgo ambleq di tamo bei a endegsi are qalqas, “Qotei na e wau ebej deqa e aqa medabu o qaji tamo bole.” O a endegsi are qalqas, “E Qotei aqa Mondor ti unum.” Di a kere are qalqo. Ariya tamo di a olo endegsi poiyem, “Anjam Pol na neŋgreŋyosiq iga qa qariŋyqo qaji endi Tamo Koba Qotei aqa segi dal anjam.” 38 Ariya tamo bei a ijo anjam endi qusim uratimqa niŋgi na endegsib minjiye, “Ni Qotei aqa medabu o qaji tamo bolesai.” 39 Deqa ijo was qu, niŋgi Qotei aqa medabu osib anjam palontqajqa tulaŋ siŋgilaoqniye. Ariya nuŋgo koroq dia tamo qudei naŋgi meŋ bulyosib qure utru segi segi naŋgo anjam maroqnib niŋgi na naŋgi olo saidnjraib. 40 Ariya niŋgi Qotei louqajqa kumbra kalil geregere dauryosib soqniye.